---
title: "Inatsisartunut ilaasortat paasisassarsiorlutik pulaartut"
description: "Pulaarnermi suliffeqarfiup ingerlanneqarnera, suliarisartagai siunissamilu pilersaarutai saqqummiunneqarput."
date: "2026-10-29"
created: "2026-10-29"
---

[Hjem](https://da.iserit.gl/)

                    [Nyheder fra Iserit A/S](https://da.iserit.gl/nyheder-fra-iserit-as)

                [Inatsisartunut ilaasortat paasisassarsiorlutik pulaartut](https://da.iserit.gl/nyheder-fra-iserit-as/inatsisartunut-ilaasortat-paasisassarsiorlutik-pulaartut)

# Inatsisartunut ilaasortat paasisassarsiorlutik pulaartut

###
**Oktoberip 28-anni 2026 Iserit A/S Inatsisartut Aningaasaqarnermut Akileraartarnermullu Ataatsimiititaliaanni ilaasortanit pingasunit pulaarneqarpoq. Suliffeqarfiup ingerlanneqarnera, suliarisartagai siunissamilu pilersaarutai saqqummiunneqarput kiisalu Iserit A/S-ip inissiaatileqatigiiffittut inissisimanera pillugu oqaloqatigiittoqarpoq.**

**![](https://da.iserit.gl/i/MOLIRIMEDIA/cb052f9d-d4a7-487d-80f4-8906853cf723?width=800)**

*Assimi saamerlermit takuneqarsinnaapput: Attartortitsinermut Pisortaq Najánguak Johansen, pisortaneq Torben Kortegaard, Controllingimut, IT-mut Ineriartortitsinermullu immikkoortortaqarfimmi pisortaq Ivalo Egede kiisalu Inatsisartunut ilaasortat Kuno Fencker, Hans Erik Enoksen aamma Margrethe Thårup Andersen.*

Inatsisartunut ilaasortat Kuno Fencker, Hans Erik Enoksen aamma Margrethe Thårup Andersen Iserit A/S-imut Nuummiittumut paasisassarsiorlutik pulaarput. Pulaartut Pisortaanermit Torben Kortegaardimit, Attartortitsinermut Pisortamit Najánguak Johansenimit kiisalu Controllingimut, IT-mut Ineriartortitsinermullu Immikkoortortaqarfimmi Pisortamit Ivalo Egedemit tikilluaqquneqarput.

Paasisassarsiornerup siunertaraa suliffeqarfiup ulluinnarni ingerlanneqarneranik, maanna suliarisartagaanik kiisalu siunissamut naatsorsuutigisaanik ilaasortat ilisimasaqarnerulernissaat.

### Inissianik pilersuinermi pingaarutilimmik inissisimaneq

Iserit A/S Kommuneqarfik Sermersuumit 100 %-imik pigineqarpoq, inissianillu attartortittakkanik 2.600-t missaanniittunik Nuummi, Paamiuni, Tasiilami, Ittoqqortoormiini kiisalu nunaqarfinni qanittuniittunik ingerlataqarluni.

Iserit A/S kommunimit pigineqartutut inissiaatileqatigiiffiulluni ingerlatsinermut inuiaqatigiinnullu tunngatillugu pingaarutilinnik suliassaqarpoq. Inissianik ulluinnarni allaffissornikkut ingerlatsinerup aserfallatsaaliuinerullu saniatigut suliffeqarfik kommunimi innuttaasut assigiinngitsunik pisariaqartitsinerat eqqarsaatigalugu ineriartortitsinissamik suliaqarpoq.

Inatsisartunik pulaartoqarnermi Kommuneqarfik Sermersuumik suleqateqarneq kiisalu suliffeqarfiup ingerlaavartumik ineriartornera eqqartorneqarputtaaq.

### Oqaloqatigiinneq pitsaasoq pissarsiffiulluartorlu

Pisortaanerup Torben Kortegaardip suliffeqarfiup suliai pillugit ilisimatitsinissamut periarfissaqarneq nuannaarutigaa.

Kalaallit Nunaanni suliffeqarfiit suliaannik ineriartornerannillu politikkikkut aalajangiisartut soqutiginninnerat tamatigut pitsaasuusoq erseqqissarpaa.

Oqaloqatigiinneq pitsaasumik pissarsiffiulluartumillu malitseqarluni ingerlanneqarpoq, tassani suliffeqarfiup ulluinnarni ingerlanneqarnera siunissamilu suliassai pillugit apeqqutinik pingaarutilinnik saqqummiussisoqarluni.

Iserit A/S-ip Inatsisartut Aningaasaqarnermut Akileraartarnermullu Ataatsimiititaliaanni ilaasortat paasisassarsiornerannut suliffeqarfiullu suliaanik soqutiginninnerannut qutsavigai.

* * *